Գայլն ու կատուն
Հեղինակ՝ Աթաբեկ Խնկոյան
Գայլն անտառից
Փախավ գեղը.
— Նեղն եմ, նեղը,
Ասավ կատվին,
Ասլան բալա,
Քո հոր պատվին
Մի ճար արա:
Մի տես հլա,
Որսորդ ու շուն,
Թազի, թուլա
Միսս են կրծում,
Ինձ հալածում:
Ա՛յ կտրվի
Դրանց հոտը,
Մի մարդ ցույց տուր
Պահվեմ մոտը:
— Ա՛յ ցեղակից, — գոչեց կատուն,
Գնա մտիր Մարոյենց տուն.
Նա չափազանց բարի կին է:
— Ես էլ գիտեմ, որ անգին է,
Բայց որ նրա հորթն եմ կերել…
— Բկիդ կանգներ, լավ չես արել:
Ա՛յ Դավթի մոտ կուզե՞ս կանչեմ:
— Նրանցից էլ ես կամաչեմ,
Հենց ամառը
Կերա Դավթի փոքրիկ գառը…
— Ո՞ւմ ասեմ էլ…
Հա, մեր Զաքին:
— Էս գարնանն էլ
Նրա մաքին…
— Ո՞վ մնաց էլ,
Հա՜, երեցը:
— Էս աշնանն էլ
Նրա էծը…
— Ա՛յ, դու ուտես
Չոռի մեծը:
Քանի՞սն եղավ
Հի՜նգը… վե՜ցը…
Ա՛յ անամոթ,
Ի՞նչ երեսով
Դու գյուղ մտար,
Ի՞նչ է, ուրիշ
Տեղ չգտա՞ր:
Գյուղն հիմա՞ր է,
Որ թշնամուն
Պատսպարե:
Ով ինչ բրթի,
Էն կխրթի:
նեղն եմ — նեղության մեջ եմ
ասլան բալա— առյուծի ձագ
ճար — հնար, միջոց, օգնություն
թազի — շուն
թուլա — շան ձագ
երեց — ավագ քահանա, մեծավոր
պահվել — թաքնվել
չոռ — ցավ, հիվանդություն
խրթել — ուտել, խժռել
մաքի — ոչխար
պատսպարե — մնալու, ապրելու, թաքնվելու տեղ տա
Ի՞նչ է նշանակում.
նեղն եմ – նեղության մեջ եմ
միսս են կրծում- վատ բաներ են ասում
կտրվի դրանց հոտը – բոլորը սատկեն
ի՞նչ երեսով գյուղ մտար – չես ամաչում
Կարո՞ղ ես թվարկել գայլի կերած կենդանիներին:
Հորթ, գառ, մաքի, էծ,
Այնպես պատմիր այս գայլի մասին, որ որևէ մեկը նրան տուն թողնի:
Այս գայլը շատ բարի է։ Նա դիտավոր չեր ուզում վնասել ձեզ, ուղղակի շատ քաղցած է եղել։ Իսկ ձեր կենդանիներն էլ հիվանդ էին, նա ձեզ ազատել է նրանցից։ Թողոք ներս գա նա խոսք է տալիս, ձեզ չի՛ վնասի։
Հիմա էլ հակառակն արա. այնպես պատմիր գայլի մասին, որ ոչ ոք նրան չընդունի:
Այս գայլը շատ չար է։ Հանկարծ նրան ներս չթողեք, ձեր բոլոր կենդանիներին կխժռի։